立法會一地兩檢開到第13次會，我一再重申現時最荒謬的，係政府一副剛愎自用態度。無論議員指出幾多漏洞、官員講野有幾前言不對後語，陳帆都毫無修改法案的意思。所以葉劉無論加幾多次會，對解決問題都無濟於事。
日前（4月23日）我主要問咗陳帆兩條問題：第一、點解唔考慮下立法會法律顧問建議，將《合作安排》裡面關於保留事項同非保留事項寫成具體條文－－現時只係用附表當講咗－－用返香港法律一貫用語，一般市民睇到比較容易明白；第二、點解西九站連接內地口岸區範圍只係用《港鐵附例》劃作「過境限制區」，而唔跟深圳灣經驗用《公安條例》劃做「禁區」。
陳帆竟然答：「我地好尊重法律顧問意見，不過實際情況考慮不一樣」，又話對於議員同法律顧問建議分析比較不同條例做法，對審議條例草案無用處、無參考作用。呢種輕蔑態度，可見政府全無誠意修補一地兩檢法案的諸多漏洞，遑論尊重大律師公會早前抨擊破壞法制的問題－－其實政府都自知修補唔到，一地兩檢本身就係違憲。
另外昨日會議多位議員問出政府前言不對後語，而多番質詢下亦打開條例另一漏洞－－港府以《港鐵附例》做煙幕，逃避向公眾交代口岸區如何執行。待續。
